که‌رکووکه‌خه‌م - ده‌ -

که‌رکووکه‌خه‌م

- ده‌ -

ئه‌مجه‌د شاکه‌لی

به‌هجه‌ت(به‌هجه‌ت تۆفیق)ی هاوڕێم، مامۆستایه‌کی خه‌ڵکی گوندی "عەلی سەرای" بوو، ماڵیان هاتبووه‌ که‌رکووک و له‌ گه‌ڕه‌کی ڕه‌حیماوا ده‌ژیان. عەلی سەرای، یه‌کێک بوو له‌و چه‌ند گونده‌ی لای خۆراوای تاوغ، که‌ دانیشتووانه‌کانیان کاکه‌یی بوون. باوکی به‌هجه‌ت، وه‌ک کارگه‌رێکی کورد، لە کۆمپانیای نەوتی کەرکووک، به‌ر بڕیاری وه‌ده‌رنان و ڕاگواستن که‌وت. به‌عس، پاکتاوی نه‌ژادی ده‌کرد و کوردی له‌ که‌رکووک دوورده‌خسته‌وه‌ و لە کارگەرانی نەوتەوە دەستیپێکرد. باوکی به‌هجه‌ت، ڕاگوێزرایه‌وه‌ بۆ سلێمانی و ئیدی هه‌موو خێزانه‌که‌ له‌گه‌ڵ باوکیدا ڕؤیشتن بۆ سلێمانی و به‌هجه‌ت به‌ته‌نیا له‌نێو خانووه‌که‌دا مابووه‌. به‌هجه‌ت، داوای له‌ خواده(خواده‌ شوکور) و من کرد، بچینه‌ ماڵه‌که‌ی ئه‌وان و هه‌رسێکمان پێکه‌وه‌ بژین. خواده‌، مامۆستا بوو و ئه‌ویش خه‌ڵکی گوندی "عه‌ره‌بکۆی"ی ئه‌و ده‌ڤه‌ره‌ی کاکه‌ییه‌کان بوو و هاوڕێی هه‌ردوومان(به‌هجه‌ت و من) بوو. ئێمه‌یش چووین و نێزیکه‌ی دوو حه‌فته‌یه‌ک‌ له‌وێ بووین. شه‌وێکیان له‌ لووله‌نه‌فتێکی ده‌وروبه‌ری باوه‌گوڕگوڕ درا و گرمه‌یه‌کی یه‌کجار مه‌زن هات و ئاگر له‌و ناوه‌ که‌وته‌وه‌. ئیدی هه‌ر وا ئۆتۆمبیلی پۆلیس و هێزی سه‌ربازی و چه‌کداری به‌عس و حوکوومه‌ت بوون، ڕوویان کرده‌ گه‌ڕه‌که‌ کورده‌کانی که‌رکووک، بۆ گرتنی خه‌ڵک و کۆنترۆلکردنی ڕه‌وشه‌که‌. فیقوفاقی ئه‌و ئوتۆمبیلانه‌یش گه‌یشتنه‌ ڕه‌حیماوا و ده‌وروبه‌ری کۆڵانه‌که‌ی ئێمه‌. ئیدی ده‌سبه‌جێ یه‌کێک له‌و خزمانه‌ی به‌هجه‌ت، که‌ له‌و کۆڵانه‌دا ده‌ژیا و ‌ سه‌ر به‌ حوکوومه‌ت بوو و جاش بوو، هه‌ستی به‌ مه‌ترسی له‌ سه‌ر ژیانی ئێمه‌ کرد، که‌ سێ زگورد و سه‌ڵته‌زه‌لامی گه‌نج بووین و بێ ژن و منداڵ و خێزان له‌ خانوویه‌کدا پێکه‌وه‌ین، به‌ خۆ و به‌ کڵاشنیکۆفه‌که‌یه‌وه‌ هاته‌ لامان و له‌به‌ر ده‌رکه‌ی حه‌وشه‌دا، زۆر مه‌ردانه‌، تا به‌یانی وه‌ک ئێشکگرێک ڕاوه‌ستا و گوتی، ئه‌گه‌ر که‌سێک له‌وانه‌ی به‌عس و حوکوومه‌ت هات و پرسیاری ئێره‌ی کرد، ئه‌وا ئێوه‌ خۆتان بکه‌نه‌ مردوو و نووزه‌تان لێ نه‌یه‌ته‌ ده‌رێ و من هه‌ر له‌به‌ر ده‌رگاوه‌ وه‌ڵامیان ده‌ده‌مه‌وه‌. ئه‌و شه‌وه‌مان هه‌ر لێ نه‌ده‌ڕۆیشت و بۆ به‌یانی، هه‌رچه‌نده‌ ڕه‌وشه‌که‌ به‌ ڕواڵه‌ت ئارام بووبووه‌وه‌، ئێمه‌ ئیدی لانه‌واز بووین و خانووه‌که‌مان چۆڵ کرد و هه‌ریه‌که‌مان به‌لایه‌کدا ڕۆیشتین.                                                                                           

2014 – 03 -23