مۆنومێنتی ئه‌نفال بۆ له‌ هه‌ولێر!

مۆنومێنتی ئه‌نفال بۆ له‌ هه‌ولێر!

ئه‌مجه‌د شاکه‌لی

16/3/2005، سه‌رۆکی حوکوومه‌تی هه‌رێمی کوردستان، نێچیرڤان بارزانی، به‌ردی بناخه‌ی مۆنومێنت(نیشانه‌ یا په‌یکه‌ر)ێکی بۆ ئه‌نفال و شه‌هیدان له‌ هه‌ولێر دانا. ئه‌و ڕێوڕه‌سمه‌ به‌ ئاماده‌بوونی کۆمه‌ڵێک به‌رپرس و خه‌ڵکانی حیزبی و کارگێڕان و ئه‌ندازیاری ئه‌و مۆنومێنته‌(خوسره‌و جاف)، دانرا. من دانانی په‌یکه‌ر یا نیشانه‌یه‌ک بۆ ئه‌نفال و شه‌هیدان به‌ کارێکی پیرۆز و باش ده‌زانم و پێموایه‌ یادکردنه‌وه‌ی شه‌هیدان و به‌ تایبه‌ت قوربانیانی ئه‌نفال، ده‌بێ وه‌ک کارێکی هه‌میشه‌یی بێت و هه‌رگیز ڕاوه‌ستانی تێدا نه‌کرێت و به‌رده‌وام بێت. دیاره‌ ئه‌نفال تا ڕاده‌یه‌ک هه‌موو ده‌ڤه‌ره‌کانی باشووری کوردستانی گرته‌وه‌، به‌ڵام ئه‌و ده‌ڤه‌ره‌ی، که‌ له‌ هه‌مووان زیاتر به‌رکه‌وت و تێداچوو و ئه‌نفال کرا و زیانمه‌ند بوو، گه‌رمیان و که‌رکووکی پێته‌ختی بوو. مرۆڤ، که‌ باسی ئه‌نفال ده‌کات و وشه‌ی ئه‌نفالی به‌رگوێ ده‌که‌وێت، ده‌سبه‌جێ ته‌واوی بیر و خه‌یاڵی بۆ که‌رکووک و گه‌رمیان ده‌ڕوات و ئه‌و ده‌ڤه‌ره‌ی دێته‌ پێش چاو و ده‌سبه‌جێ پڕ گوێی ده‌بێت له‌ شین و شه‌پۆڕ و زریکه‌ و قیژه‌ و گریانی ژن و پیر و لاو و منداڵی ئه‌نفالکراو. که‌ که‌رکووک "دڵ" و "قودس" و "پێته‌ختی کوردستان" و "کرۆکی کێشه‌ی کورد" بێت، به‌ پێی سه‌رکرده‌یه‌تیی سیاسیی کورد و ده‌سه‌ڵاتدارانی کوردستان، که‌ که‌رکووک بۆ خۆی ئه‌نفالستان بێت و هه‌موو بسته‌ خاک و زه‌وییه‌کی گه‌رمیان و که‌رکووک ئه‌نفالگه‌یه‌ک بێت، ئیدی بۆچی په‌یکه‌ری ئه‌نفال له‌ هه‌ولێر دروست ده‌کرێت؟ سه‌رکرده‌یه‌تیی سیاسیی کورد، ده‌بوو هه‌موو هه‌وڵ و توانست و کۆشش و ئاوه‌زێکیان وه‌گه‌ڕخستبا، بۆ ئه‌وه‌ی له‌ هه‌موو کار و هه‌نگاو و بڕیارێکیاندا، ئه‌گه‌ر تاکه‌ یه‌ک میللیمیتریش له‌ که‌رکووک بچنه‌ پێشه‌وه‌ و تاکه‌ یه‌ک میللیمیتریش که‌رکووک به‌ره‌و ئامێزی به‌شه‌ ڕزگارکراوه‌که‌ی کوردستان بهێننه‌وه‌، سستی نه‌که‌ن و دوودڵیی نه‌که‌ن و هه‌رچی زووتره‌ به‌ره‌وپیری بچن. ئه‌گه‌ر تیۆری "بێپا و پادار"، بکه‌ینه‌ پێوه‌رێک بۆ هه‌ڵسوکه‌وت و مامه‌ڵه‌کردن له‌گه‌ڵ کێشه‌ یا شته‌ یا باره‌، گرنگ و گرنگتر و گرنگترینه‌کاندا، ئه‌وا هه‌ولێر و سلێمانی و دهۆک بێپاکانن و که‌رکووکیش پادار. که‌رکووک پاداره‌  گرنگترینه‌که‌یه‌ و ده‌بێ وه‌پێشی هه‌موو ئه‌رکه‌کانی دیکه‌ بخرێت. سه‌رکرده‌یه‌تیی سیاسیی کورد ده‌بوو و ده‌بێ له‌ هه‌موو کارێکیدا وه‌ها بیربکاته‌وه‌ و پاداره‌که‌ بگرێت و گرنگییه‌کی پتری پێ بدات، نه‌ک بێپاکان. تۆ که‌ مۆنومێنتێک بۆ هه‌ڵه‌بجه‌ و شه‌هیدانی چێ بکه‌یت، باشترین و شایسته‌ترین جێگه‌ بۆ ئه‌وه‌ هه‌ڵه‌بجه‌یه‌. مۆنومێنتی ئه‌نفال و مۆزه‌ی ئه‌نفال و هه‌موو شتێکی پێوه‌نددار به‌ ئه‌نفاله‌وه‌ ده‌بێ له‌ که‌رکووک بێت و چێبکرێت، نه‌ک له‌ شوێنه‌کانی تر. ئه‌گه‌ر مۆنومێنته‌که‌ بۆ ته‌واوی شه‌هیدانی کوردستانیشه‌، به‌ ئه‌نفال و کوردانی فه‌یلی و بارزانییه‌کان و هه‌ڵه‌بجه‌ و هه‌موو ئه‌وانی دیکه‌شه‌وه‌، ئه‌وا هیشتا که‌رکووک شایسته‌ترین جێگه‌یه‌ بۆ ئه‌وه‌.                                         

20/3/2005